Калектывізацыя сельскай гаспадаркі ў Іванаўскім раёне Пінскай (з 1954 г. Брэсцкай) вобласці была актыўна праведзена ў 1949–1950 гг. У 1949 г. у вёсцы Опаль з’явіўся калгас «Радзіма». 26 жніўня 1950 г. да яго былі далучаны калгасы «Серп і молат» (Туляцічы) і «1 Мая» (Лядавічы). Старшынёй узбуйненага калгаса «1 Мая» стаў Аляксандр Яфімавіч Галавешкін, які да гэтага працаваў загадчыкам зямельнага аддзела Іванаўскага райвыканкама. Выгады ўзбуйнення былі відавочнымі. У гаспадарцы ў некалькі разоў узрасла ўраджайнасць сельскагаспадарчых культур і павялічыўся іх валавы збор. Павялічылася пагалоўе кароў, свіней, коней і павысілася іх прадуктыўнасць. Быў пабудаваны завод па вырабе цэглы і вапны, новыя калгасна-брыгадныя двары ў Опалі і Лядавічах, быў адкрыты радыёвузел.

Саўгас «Брэсцкі» Брэсцкага раёна Брэсцкай вобласці быў заснаваны ў маі 1957 года ў выніку аб’яднання трох калгасаў. Першымі старшынямі тых калгасаў былі Андрэй Іванавіч Зарэмчук, Андрэй Ануфрыевіч Пугач, Міхаіл Аляксеевіч Саўчук, якія ў цяжкі пасляваенны час усе сілы аддавалі наладжванню сельскагаспадарчай вытворчасці.

З сярэдзіны 1950-х сельская гаспадарка БССР уступіла ў перыяд адносна стабільнага развіцця.